(İxtisarla)

Gözəldir, göyçəkdir bizim
                    körpələr,
dünya -
hərəsinin öz oylağıdır.
Gör necə qəşəngdir körpə
                    biləklər,
elə bil
ən zərif gül saplağıdır.
Bizim sabahımız -
             bu körpələrdir.
bizim pənahımız –
bu körpələrdir.
Onlardır
dünyanın ən qiymətlisi,
bu günün,
sabahın ən şöhrətlisi.
Atalar, analar,
qalxın ayağa -
körpə ayaqlara yeriş gərəkdir,
körpə dodaqlara gülüş
                    gərəkdir,
hər beşik üstünə günəş
                    gərəkdir...
Qalxın,
bu səadət xətrinə qalxın!
Bu dostluq,
bu ülfət xətrinə qalxın!
Xərabələr üstə şən həyat
                    olsun,
biz quraq, yaradaq, onlar şad
                    olsun.